之前貼文講過如何一take過驗配老花漸進鏡和如何正確地使用漸進鏡，今篇貼文就講下較深老花度數嘅人客配戴完漸進鏡後，最經常會投訴嘅問題：就係覺得睇電腦好辛苦，成日都要愕起個下巴，條頸好攰。呢個問題通常都會發生係老花度數高於175度嘅人客和一些每天經常都要長時候對着電腦工作既人仕或專業人士如會計師、工程師、建築師、設計師和老師等等，以下會講下點解和解決方法。
一般人客睇電腦嘅距離大概都係7-80 cm左右，呢個係屬於一個中近距離，亦係一般漸進鏡處理得最弱嘅一環。漸進鏡嘅上部份係冇老花度數，用嚟睇遠野用的，下部份就有最足嘅老花度數，用嚟睇書或者手機用的，而中間亦有少部份嘅位置係用嚟睇中近距離嘅事物，但範圍其實並不廣，當老花度數越深，這個用嚟觀看中近距離事物嘅部份就會變得越窄，增加睇電腦嘅難度。其實有較深老花度數和對睇電腦有要求嘅人客，必須要明白這一點，知道漸進鏡其實係有佢嘅弱點，而不是無敵的。
明白左，咁又點處理呢？通常遇到呢個情況，最好嘅解決方法係需要配多一副名為辦公室漸進（又名中近漸進和室內專用漸進）嘅眼鏡，視光師會因應你睇電腦嘅距離，而為你度身訂造一個辦公室漸進眼鏡。這種鏡片嘅上部份係中近距離嘅老花度數，用嚟睇電腦，而下部份就跟普通漸進鏡片一樣，有最足嘅老花度數，用嚟觀看近距離事物，由於遠距離部份拎走左，所以辦公室漸進鏡片有一半嘅範圍係用嚟睇電腦，而另一半嘅範圍用嚟睇文件或者手機，所以會有較廣嘅視野範圍俾人客睇電腦和文件。人客通常會將佢放喺公司枱頭，一返到公司明知要對住個電腦4-6個鐘，就會換上呢副辦公室漸進眼鏡，收工嘅時候就會換返普通漸進眼鏡。大部份配左辦公室漸進眼鏡嘅人客，都會感到非常滿意，因為它可以大大咁提升咗佢哋嘅工作效率！
希望以上資訊可以幫到一啲有老花和長期使用電腦嘅人士或專業人士，解決你哋遇到嘅煩惱。由於辦公室漸進眼鏡通常都係第二副眼鏡，所以定價都會比一般漸進鏡片略低一點，有興趣嘅朋友歡迎隨時查詢。
陳家豪, Paco
註冊視光師 (第I部份)