做兒童驗眼除咗驗眼過程難道度會大啲之外，如果發現小朋友眼睛有度數問題，需要戴眼鏡，就要同家長講出呢個事實。去到呢個位，家長好多時都會晴天霹靂，一時三刻未必接受到呢個事實，不過呢個就係我嘅工作，差唔多每日都會講類似嘅說話，希望家長明白點解咁細個小朋友要戴眼鏡，呢篇網址就等我分享一下。
喺開始之前，先講解一下一個正常三四歲兒童應該要見到嘅度數範圍。三四歲兒童大部份都係有100至200遠視，因為佢哋眼球比較短啲，長大咗之後啲遠視就會慢慢減退，如果細個嘅時候遠視較淺，長大有近視嘅風險會相對提高。不過遠視較淺都唔係兒童要戴眼鏡嘅原因，我哋最擔心就係見到一啲會影響視力發展，導致小朋友有弱視嘅度數：
1) 散光
兒童散光成因係先天為主。原因係因為眼睛最表面透明叫角膜嘅結構，垂直和水平嘅弧度唔平均 ，如果角膜圓到好似個足球咁，就無散光，好似個欖球咁，就會有散光。通常小朋友有125 – 150 度散光，就會開始影響視力發展，形成弱視。戴眼鏡嘅目的係透過散光鏡片將光線聚焦返喺個視網膜上面，等個腦可以接受返一啲清晰嘅視覺訊號，久而久之，視力就會越嚟越好，將弱視更正過來。家長可能會問：咁即係戴眼鏡會減淺個散光？個答案係不會。散光喺成年之前都傾向穩定，戴眼鏡嘅目的唔係減散光，係等眼睛視力可以正常咁發展。 深散光嘅發生率，全世界嘅報告都有啲唔同，大概15% 左右，所以都唔係罕見，差唔多每驗10個小朋友，就會有1-2 個有深散光。
2) 鴛鴦度數
小朋友雙眼嘅度數大多數都係一致嘅，不過都會有鴛鴦嘅情況出現。有鴛鴦度數嘅小朋友，一般家長都完全察覺唔到，因為個小朋友有一隻睇嘢好清楚嘅好眼，日常生活基本上都冇乜問題，但一驗眼先知道度數較深嗰隻眼睇嘢非常模糊，有弱視嘅情況。咁究竟兩隻眼相差幾多度數，先會令到深啲度數個隻眼有機會有弱視呢？散光相差150度，遠視相差100度和近視相差300度，就會有機會令到度數深啲嗰隻眼出現弱視。遇到呢啲情況，小朋友都一定要戴眼鏡提升睇嘢差啲嗰隻眼嘅視力。假若到咗9歲先至處理，就已經太遲，到時先戴眼鏡，深啲度數嗰隻眼永久個視力可能都係可能得正常嘅5-6成。鴛鴦度數嘅發生率大概為4-6%左右，不是太常見，但總會遇到。
3) 高度遠視和近視
高度數一般被定義為大於600度。三四歲兒童患有高度遠視和近視係較為罕見，發生率大約少於2%，筆者大概每兩至三個月，就會遇到一個呢啲嚴重嘅個案。兩眼患有高度遠視和近視嘅小朋友通常都有明顯嘅症狀，最常聽到家長嘅觀察就係話小朋友會非常近咁睇書睇電視、長期朦起對眼望野和無咩眼神交流。小朋友患有咁深度數可能同遺傳和早產有關，不過筆者亦都遇過啲個案係雙方家長眼晴視力完全正常，但小朋友兩眼不幸地患有高度數，面對呢啲個案，我有時都解釋唔到，我可以做嘅只係希望家長盡快明白呢個狀況，盡快幫小朋友配返一個啱度數嘅眼鏡，等佢哋可以重拾視力。
希望以上資訊可以幫助家長們了解點解有某部分小朋友咁細個就要戴眼鏡，同埋更加了解兒童驗眼嘅重要性。有需要或想幫自己子女驗眼既家長歡迎隨時查詢，本視光中心接受兩歲或以上嘅兒童預約的。
陳家豪, Paco
註冊視光師 (第I部份)