不時幫人客驗眼嘅時候，都會聽到佢哋講：夜晚見到啲街燈散開，我散光深咗？其實呢個情況，通常都係因為一個名為生理眩光(Physiological Halo)?嘅生理加物理現象所致。當然如果有未矯正嘅散光，的而且確啲街燈係會再散啲嘅。但如果雙眼嘅度數已用眼鏡完全矯正和眼睛又非常健康，生理眩光就係見到“散光”嘅原因。
咁究竟生理眩光係咩嚟嘅呢？回答呢個問題之前，大家要明白一個叫做衍射(diffraction)嘅物理現象：就係當一束光線穿過一個好窄嘅空隙嘅時候，光線就會變得散開。咁係眼睛入面，邊度有啲好窄嘅空隙呢？就係喺組成晶狀體千千萬萬個纖維細胞之間。所以夜晚見到街燈散開就係因為眼內出現衍射呢個物理現象所致。咁又有人可能問，點解淨係夜晚嘅街燈散得特別明顯？其實係有得解釋嘅，原因有兩個：
1) 夜晚個瞳孔變大左，就會暴露多咗纖維細胞之間嘅空隙，衍射會變得犀利左，啲光變得再散啲。
2) 街燈通常都係釋放一種叫做Sodium light 嘅單色黃光，佢嘅波長係589nm，剛巧跟人眼最敏感嘅可見光波長（555nm嘅黃光）極為接近。所以配合一個全黑嘅夜空，同埋一個最敏感嘅黃光，見到嗰啲散開嘅光就會變得好明顯。
不過有啲眼病例如急性青光眼、白內障和錐形角膜都會令到投射到視網膜嘅光線變得唔集中，而看見“散光”，這類形嘅眩光稱為病理眩光(Pathological Halo)，係需要處理的。不過如果眼睛所有健康狀況都係正常，而眼睛度數全部都被矯正，夜晚都見到街燈散開的話，唔需要太過擔心，因為呢個就係生理眩光，我晚晚都見到。
當然透過做定期嘅全面眼科視光檢查 (https://www.taikwongeyecare.com/全面眼科視光檢查/)，視光師就可以話您知究竟見到嘅係生理抑或係病理眩光，唔晒估估吓，甘擔心了！
陳家豪, Paco
註冊視光師 (第I部份)