幫客人配合適的漸進鏡係視光師每天會做嘅事，但不少客人在配漸進鏡前都對它存有偏見，覺得會好難適應或者聽見朋友失敗經歷之後，自己就唔敢去試。根據本人執業八年，驗配過無數對漸進鏡嘅經驗，以下係一啲成功令人客配一副滿意的漸進鏡的重要因素。
1. 眼睛度數一定要驗得準確。八九成嘅香港人都係有近視，有近視嘅人配戴漸進鏡已經係比較容易適應，但點解都會有啲人客唔成功呢？就係因為有好多時候近視度數都比本身嘅度數驗得為深。漸進鏡嘅近視度數是和老花度數是有關係的，如果近視度數驗多咗75度，漸進鏡嘅老花度數就會少咗75度。係咁嘅情況下，漸進鏡睇近嘅時候又點會清楚呢？又或者人客成日要將個漸進鏡托高先睇到近野，戴一副啱度數嘅漸進鏡根本就唔需要做呢個動作的。
2. 要揀啱鏡框。配漸進鏡最好揀一個有鼻托嘅鏡框，點解？因為亞洲人鼻骨較扁，配戴沒有鼻托嘅眼鏡，通常眼鏡都會好貼面，如果漸進鏡太過貼面，眼球就需要向下轉動較大嘅幅度先搵到相應嘅老花度數嘅位置，又或者成日都要托高個眼鏡先睇到近野(又托高個眼鏡…)。另外，眼鏡最短高度要幾多？筆者認為最短有3cm已經足夠，當然大至4cm 都可以，但用太大嘅眼鏡來做漸進鏡並不是一件好事，因為咁樣只會增加漸進鏡周邊模糊區嘅位置，增加適應嘅難度。
3. 要跟視光師有良好嘅溝通，說明你嘅視力需求。因為不同鏡種嘅漸進鏡都有佢哋自己嘅長處同短處，譬如話你成日要睇電腦，視光師就會揀一啲中距離度數較強嘅鏡種俾你選擇，又或者最少都選擇一款長走廊設計嘅鏡片俾你，等你睇電腦嘅空間大一點。如果配鏡前沒有溝通清楚，大家只係估吓估吓，當然失敗嘅成功率就會增加。不過冇溝通好絕對唔係人客嘅全部責任，作為一個稱職嘅視光師或眼鏡銷售員，一定要具備良好嘅溝通技巧，從而了解客人嘅需求，將合適嘅產品介紹給人客。
4. 不要選擇過分便宜的漸進鏡片。筆者接觸唔少人客到外地驗配價錢較平的漸進鏡後，失敗嘅例子，覺得對鏡好浮，好難適應，好唔鍾意。正所謂一分錢一分貨，打磨一副好嘅漸進鏡背後需要嘅技術和儀器係需要成本的，如果負擔唔起一啲日本、法國或者德國嘅漸進鏡，其實香港本土都有一啲做得幾好嘅漸進鏡片生產商，價錢千多元左右一對起跳，已經做到唔錯既效果。海外嘅品牌都要二千尾起跳，品質的而且確係有啲分別，人客需要適應嘅時間係會短啲，感受係舒服啲。
以上只是筆者一啲小心得，希望幫到大家可以一take過配到合適嘅漸進鏡。由於每個人客嘅要求都唔一樣，所以根本冇一個絕對成功驗配漸進眼鏡嘅方程式，客人只需搵到會聆聽你需求嘅視光師，咁樣已經距離成功驗配漸進眼鏡邁向重大嘅一步！
陳家豪, Paco
註冊視光師 (第I部份)